पाणी,वीज,रस्ता,दवाखाना,शाळा,अंगणवाडी द्या;बिरसा फायटर्सचे पंचायत समिती धडगांव समोर ठिय्या आंदोलन

५ ग्रामपंचायतींचे चौकशी आदेश; पाणी,वीज, रस्ता,शाळा,अंगणवाडीबाबतही लेखी आदेश

धडगांव प्रतिनिधी: पाणी द्या ,रस्ता द्या,वीज द्या,दवाखाना द्या,शाळा द्या,अंगणवाडी द्या, भ्रष्टाचारी सरपंच व ग्रामसेवकावर कारवाई झालीच पाहिजे, बंद करो ,बंद करो भ्रष्टाचार बंद करो, भ्रष्टाचार हटाओ नंदूरबार जिल्हा बचाओ म्हणत भ्रष्टाचाराचाविरोधात व आदिवासी समाजाच्या विविध मागण्यांकरिता बिरसा फायटर्स संघटनेकडून पंचायत समिती धडगांव समोर १५ एप्रिल २०२५ ला ठिय्या आंदोलन करण्यात आले.यावेळी बिरसा फायटर्सचे राष्ट्रीय अध्यक्ष सुशिलकुमार पावरा,तालुकाध्यक्ष सुनिल तडवी,दिलवर पाडवी, गौतम वसावे,सुरतान पावरा,गणपत वळवी, गुलाबसिंग पाडवी,वन्या पावरा,कुंवरसिंग पराडके, अजय वळवी सह शेलदा,केलापाणी,बिलगांव हेंद्यापाडा,मोडलगांव,जुगनी,भोगवाडे,बोरवण, चूलवड इत्यादी गांवातील हजारों बिरसा फायटर्स कार्यकर्ते उपस्थित होते. 

                धडगांव तालुक्यातील ग्रामपंचायत मोडलगांव, भोगवाडे, चूलवड, बोरवण, जुगनी येथील भ्रष्टाचाराची सखोल करून संबंधित सरपंच व ग्रामसेवकावर कायदेशीर कारवाई करावी व तालुक्यातील भ्रष्टाचार झालेल्या ग्रामपंचायतींची सखोल चौकशी करून संबंधितांवर कडक कारवाई करावी.धडगांव तालुक्यातील ग्रामपंचायत जुगनी येथील ग्रामसेवकाने माहिती अधिकारात माहिती देण्यासाठी अर्जदार गणपत जोमा वळवी यांच्याकडून तब्बल १९००० रूपये उघडल्याप्रकरणी ग्रामसेवक श्री. राजेश अशोक ब्राम्हणे यांना तात्काळ सेवेतून निलंबित करा. धडगांव तालुक्यात माहिती अधिकार अधिनियम २००५ ची अंमलबजावणी केली जात नाही.

अंमलबजावणी न करणा-या अशा जन माहिती अधिका-यांवर कायदेशीर कडक कारवाई करावी. ग्रामपंचायत जुगनी येथील ५ अपत्ये असणारे श्री.आट्या वेरांग्या वळवी यांचे ग्रामपंचायत सदस्यत्व रद्द करावे व तालुक्यातील अशे २ पेक्षा अधिक अपत्य असणा-याचे सरपंच, उपसरपंच, ग्रामपंचायत सदस्यत्व रद्द करण्यात यावे. धडगांव तालुक्यातील केलापाणी येथे जाणारा रस्ता तात्काळ खडीकरण व डांबरीकरण करावा, जलजीवन मिशन योजनेंतर्गत पाण्याची सोय करावी, विजेची सोय करावी,शाळा व अंगणवाडी सुरू करावी.धडगांव तालुक्यातील शेलदा गांवातील लोकांचे वनदावे मंजूर करावेत, गांवात जलजीवन मिशन योजनेंतर्गत पाण्याची सोय करावी,विजेची सोय करावी,शाळा व अंगणवाडी,ग्रामपंचायत इमारत बांधकामास वनविभागाची परवानगी मिळावी.धडगांव तालुक्यातील बिलगांव हेंद्र्यापाडा येथे जाण्यासाठी ३ किलोमीटरचा रस्ता तात्काळ खडीकरण व डांबरीकरण करा,जलजीवन मिशन योजनेंतर्गत पाण्याची व्यवस्था करावी,विजेची सोय करावी,शाळा व अंगणवाडी सुरू करावी.धडगांव तालुक्यातील बिलगांव- पाटील पाडा ते अडीखूडी पाडा रस्ता तात्काळ खडीकरण व डांबरीकरण करावा.धडगांव तालुक्यातील असपा-पिप्री ते तिनसमाळ रस्ता खडीकरण व डांबरीकरण करावा.

                       धडगांव तालुक्यातील रस्त्यांचे व पुलांचे निष्कृष्ट कामांची सखोल चौकशी करून संबंधित अभियंता व ठेकेदारांवर कडक कारवाई करावी.पंतप्रधान घरकुल योजनेत भ्रष्टाचार करणा-यांवर कडक कारवाई करावी.धडगांव तालुक्यातील विशेष सहाय्य योजनेंतर्गत संजय गांधी निराधार विभाग येथील प्रकरणे निकाली काढावेत. आदिवासी विकास विभागाचा ४ हजार कोटी व समाजकल्याण विभागाचा ३ हजार कोटी असा एकूण ७ हजार कोटी निधी लाडकी बहीण योजनेसाठी महाराष्ट्र सरकारने वळवलेला आहे,तो निधी आदिवासी विकास विभाग व समाजकल्याण विभागास परत करावा.

व्यक्ती व संघटना यांच्या अभिव्यक्ती स्वातंत्र्याला बाधा आणणारे, लोकशाही मूल्यांविरुद्धचे महाराष्ट्र विशेष जनसुरक्षा विधेयक लागू करू नये.शेतक-यांचे १००% कर्ज माफ करावे.अशा विविध मागण्यांचे निवेदन गटविकास अधिकारी पंचायत समिती धडगांव यांना देण्यात आले.यावेळी ५ ग्रामपंचायतींच्या चौकशीचे आदेश देण्यात आले.पाणी,वीज, रस्ता,शाळा ,अंगणवाडी इत्यादी मागण्यांबाबत संबंधित विभागाला लेखी निर्देश देण्यात आले.मागण्यांबाबत ठोस कार्यवाही न झाल्यास धडगांव पंचायत समितीच्या गटविकास अधिका-याविरोधातच जिल्हा स्तरावर उग्र आंदोलन छेडण्याचा इशारा बिरसा फायटर्स संघटनेकडून देण्यात आला आहे.