🚩 लंगडी ते शहाणे पुतड्याचा रस्त्याच्या दुरुस्तीसाठी बिरसा फायटर्स आक्रमक; डांबरीकरण न झाल्यास तीव्र आंदोलनाचा इशारा!

तात्पुरत्या खडीकरणाला पूर्णविराम द्या; लंगडी ते शहाणे पुतडा रस्त्याचे दर्जेदार डांबरीकरण करा — राज्य उपाध्यक्ष गणेश खर्डे

शहादा प्रतिनिधी : शहादा तालुक्यातील लंगडी ते शहाणे पुतडा या रस्त्याची अत्यंत दयनीय अवस्था झाली असून, रस्त्यावरील खड्डे आणि वाहून गेलेल्या खडीमुळे नागरिकांना मोठ्या अडचणींचा सामना करावा लागत आहे. या रस्त्याचे तातडीने दर्जेदार खडीकरण व डांबरीकरण करण्यात यावे, या मागणीसाठी बिरसा फायटर्सचे राज्य उपाध्यक्ष मा. गणेश खर्डे यांनी शासन व संबंधित प्रशासनाकडे निवेदन सादर केले आहे.

मागील काळात या रस्त्यावर केवळ खडीकरण करण्यात आले होते. मात्र, पावसाळ्यात खडी वाहून गेल्याने रस्त्याची अवस्था पुन्हा खराब झाली आहे. मलगाव, सटीपाणी, लंगडी, चांदसैली व भुलाणे परिसरातील नागरिकांसाठी हा रस्ता महत्त्वाचा असून, विद्यार्थी, शेतकरी, कामगार आणि सर्वसामान्य नागरिकांना प्रवास करताना त्रास सहन करावा लागत आहे. विशेषतः रुग्णांना प्राथमिक आरोग्य केंद्र तसेच शासकीय रुग्णालयात घेऊन जाताना अडचणी निर्माण होण्याची शक्यता आहे.

सदर रस्त्याची तातडीने पाहणी करून खड्डे बुजविणे, दर्जेदार खडीकरण व डांबरीकरण करणे आणि रस्त्याची कायमस्वरूपी दुरुस्ती करणे, अशा प्रमुख मागण्या निवेदनाद्वारे करण्यात आल्या आहेत. केवळ तात्पुरती मलमपट्टी न करता टिकाऊ व दर्जेदार काम करण्यात यावे, अशी मागणीही करण्यात आली आहे.

या निवेदनाच्या प्रती सार्वजनिक बांधकाम विभागाचे मंत्री, अतिरिक्त मुख्य सचिव, रस्ते विभागाचे सचिव, नाशिक विभागीय आयुक्त, नंदुरबार जिल्हाधिकारी तसेच सार्वजनिक बांधकाम विभागातील संबंधित अधिकाऱ्यांना देण्यात आल्या आहेत.

“नागरिकांना सुरक्षित आणि सुकर प्रवासाचा हक्क आहे. प्रशासनाने या समस्येकडे गांभीर्याने लक्ष देऊन रस्त्याच्या दुरुस्तीचे काम तातडीने सुरू करावे. अन्यथा परिसरातील नागरिकांना सोबत घेऊन लोकशाही मार्गाने तीव्र आंदोलन छेडण्यात येईल,” असा इशारा बिरसा फायटर्सचे राज्य उपाध्यक्ष मा. गणेश खर्डे यांनी दिला आहे.

आता संबंधित प्रशासन या मागणीची कितपत दखल घेते आणि प्रत्यक्ष कामाला कधी सुरुवात होते, याकडे परिसरातील नागरिकांचे लक्ष लागले आहे.

— मा. गणेश खर्डे

राज्य उपाध्यक्ष, बिरसा फायटर्स, महाराष्ट्र राज्य